喺尖沙咀食飯搵間舒舒服服吹下水嘅地方都唔太易，有人提議不如食下串燒啦，上網搵搵就見到呢一間新開嘅串燒店。
佢落單好方便，可以用app scan 個QR code 落單。
花甲粉幾足料，入邊好唔少花甲，肉質唔錯又冇沙，麻辣湯底對我呢啲只係食三小辣嘅人都頂得住，粉絲爽口掛汁，唔會好容易哽喉嚨。
椒鹽魷魚鬚幾彈牙，炸漿一啲都唔厚，啖啖肉咁。
串燒方面就叫咗燒雞軟骨，咬落去油脂豐腴，軟骨爽脆。
串燒南美虎蝦燒得幾好，肉質唔會太乾。
串燒雞中翼一客兩隻，上面灑上好多孜然粉去燒，外皮咬落去脆脆地，裏面仍然保持好Juicy。
叫咗咁多肉都係要食返啲菜嘅，個燒韭菜𡁻起上嚟冇渣，雖然有調味但仍然夠清清甜甜咁。
燒茄子🍆值得推，自己喺屋企焗好易唔夠淋，呢間整得起好，茄子皮帶點脆，裏面嘅茄子肉好軟爛。
燒雞泡魚乾鮮甜味美，細細咀嚼嗰陣時魚香出哂黎，連沙律醬都唔使蘸就已經好正。
