作為西營盤街坊，有新店開張當然會去捧場，呢日就嚟到水街幫襯「師兄漢堡」。原來小店尋日(星期日)正式開業，所以門口仲擺放住各方好友送嚟嘅花牌🎊。
呢度面積細細，聽老闆講係想主打外賣生意🥡，但同時亦提供少量座位以供堂食。老闆非常友善，主動同客人傾偈，並詢問有關食物嘅意見。
小店售賣四款漢堡包🍔，豬牛雞素各一款，並可加配套餐，+$20有小食同飲品。漢堡包目前定價為$75/$85，老闆話會睇吓街坊嘅反應，短期內再檢視餐牌。
香煎未來肉排漢堡伴田園大啡菇($85)，作為食肉獸嘅我本身對素肉不抱太大興趣🙈，但佢個樣望落都幾吸引嘅，驟眼睇同牛肉漢堡無分別。未來肉排味道好OK喎，質感結實唔鬆散，富有彈性。我其實唔係第一次食未來肉，但呢塊感覺特別，原來係因為貨源來自泰國，餐廳選材有眼光。另外，🍄大啡菇係第二矚目嘅配料，離遠已經聞到菇香，而且仲好多汁添，正啊。其餘配料則包括生菜、蕃茄同芝士等。醬汁亦係精華所在，並由廚師自家調製，我食得出有啲芥末味。
咕嚕肉排漢堡伴焦糖菠蘿($75)，呢個漢堡包可算係Fusion菜嘅代表。佢將🥢中式小菜「咕嚕肉」融入於西式漢堡，成個組合出到嚟冇乜違和感。咕嚕汁甜甜酸酸，再加埋焦糖菠蘿🍍，令人開胃。咕嚕肉排一件過上，幾大塊同厚身，豬排肉質亦唔嚡🐷，但炸衣較厚同埋偏濕，唔係我心目中最好食嗰種，不過都OK嘅，純粹我嘴刁啫。漢堡包嘅麵包層都幾好，表面經烘烤過，微微脆，而內裏就保持鬆軟，並唔乾身。
脆炸三味，三味係指鴛鴦燒賣(魚肉燒賣&豬肉燒賣)以及墨魚丸🍢。佢哋經脆炸後，成個感覺就已經同蒸煮唔同，墨魚丸係最好食同彈牙。不過咁樣都未係重點，皆因個辣醬先係主角🌶，佢超好味啊，係我鍾意食嘅麻辣。佢辣度同麻度顯住，而且仲加咗啲肉碎，以添鹹香，Encore！
炸薯條，🍟薯條就冇乜特別啦，配茄汁食，份量適中；不過抵讚嘅係佢唔會太油。
飲品方面，老闆推介我哋飲冷泡茶(+$5)，是日有兩款口味，包括翠綠烏龍同埋白牡丹茶🍵。兩者味道都幾清香，最重要係無糖無添加。如果一定要二揀一嘅話，白茶感覺特別啲。
總括嚟講，👦🏻師兄漢堡嘅食物質素幾有水準，漢堡包款式有經過精心設計。我感受到老闆用心經營，希望小店會成功啦，大家多多支持。遲啲有機會我都想試埋佢另外兩款Burger啊😉。
