首先叫啲小食同飲品， 我就叫左白桃梳打，朋友就叫左Highball。味道都唔錯，尤其係白桃梳打，桃味好香，有唔少嘅白桃果肉。
麻醬蕃茄豆腐沙律，主角嘅蕃茄好甜好清新，加上麻醬豆腐同羅馬生菜，非常開胃。
辣味豆腐外脆內軟，炸得真係好香口，好惹味。
炸蓮藕片好脆，切到好薄，好似食薯片咁。食極都停唔到， 送酒真係一流。
刺身三盛分別有三文魚、帶子、油甘魚，仲叫左份甜蝦刺身，甜蝦都幾大隻，肉質爽口，三文魚刺身都幾厚，充滿魚油甘香，帶子味道好甜。
壽司盛合都好豐富，有鯛魚、油甘魚、北寄貝、大蝦、同我最愛嘅海膽同三文魚子，海膽好Creamy，鯛魚清爽，油甘魚口感肥美。
之後就留番個肚食我鍾意嘅甲羅燒，店員好細心咁幫我哋用爐火燒香。甲羅燒分別叫左黑松露口味同蟹味噌，兩款都好甘香，加上脆卜卜蟹籽，好正。
跟住我哋仲叫咗個鮑魚殼燒，鮑魚好新鮮，上檯時仲識郁，店員只係加左簡單嘅醬油調味去燒，帶出鮑魚嘅鮮味，味道好鮮甜爽口。
雖然有排都無得去日本，但同朋友食下日本料理都幾開心！
