一踏入迎海皇宴，成個維港即刻喺腳下展開！22樓高空景觀霸氣到極，落地玻璃外係郵輪同霓虹燈海，室內水晶吊燈將枱上陶瓷餐具照到閃閃發光。仲有個室外空中證婚花園，270度海景襯住浪漫夕陽，難怪食晚飯嘅時候見到幾對新人入嚟睇場地！
🦪原隻鮑魚粉絲煲 ($158)
六隻鮑魚鋪到滿滿當當，炆得軟淋入味得嚟又保持彈牙。粉絲吸盡鮑魚同蒜蓉精華，乾身唔油膩，用匙羹兜起仲有鑊氣白煙飄出～
🐟清蒸生猛龍躉斑 ($138）
一上枱就知係狠角色！魚身蒸到剛剛離骨，魚皮黏滑帶膠質，豉油汁甜度恰到好處。最正係魚腹位嫩到豆腐咁，足一斤二$138呢個價錢真係抵食！
1
🏅得獎叉燒皇 ($88)
琥珀色蜜糖脆邊係靈魂！半肥瘦梅頭肉咬落先脆後糯，肉汁湧出。秘密在於表面掃咗層麥芽糖同老抽，焦香得嚟帶微微燶邊，佐白飯可以輕鬆KO兩碗！
🍗金牌脆皮燒雞 ($93)
雞皮薄過蟬翼，脆到似食緊薯片！雞肉保持濕潤不柴，皮下脂肪全部逼走，蘸點醬更加凸顯雞味。睇住維景食燒雞，忽然倍感貴氣！
🍚瑤柱鮮蝦雞粒福建飯 （$148）
濕炒派必愛！飯粒分明掛滿金色芡汁，瑤柱絲增加鹹香，蝦球同雞粒雙重口感，個人私心推薦！
🥬蒜茸炒白菜仔 ($92)
唔好以為簡簡單單，棵棵白菜仔都鮮嫩翠綠，一啲燶邊發黃都冇，加上蒜蓉清炒，鮮甜清新～
望住窗外幻彩詠香江，飲啖熱普洱，再夾件脆皮雞。呢種居高臨下食中菜嘅體驗，絕對係尖沙咀高空飲食新標竿！
