喜聚燒 (Closed)

喜聚燒呢間喺尖沙咀寶勒巷嘅樓上串燒店，以為呢度係日式串燒餐廳，原來仲有四川嘅麻辣雞煲。喜聚鑊仔麻辣雞上檯唔係用鑊仔，係用鐵板上檯，底下仲放咗蠟燭，為麻辣雞保持溫度。而雞肉好嫩滑，醬汁好惹味，辣度唔高，有陣陣麻香，越食越過癮，如果嫌唔夠辣，可以喺落單時選加辣。燒蟶子皇（蒜蓉）蟶子好新鮮，肉厚飽滿，火候控制得宜，鮮甜味美，口感彈牙爽口，配埋香濃嘅蒜蓉，就更加滋味。黑胡椒燒肥腸 鍾意食炸大腸嘅朋友呢個可算係必點，佢無炸大腸嘅油膩感，但經過燒烤，亦能做到外脆內軟嘅口感，甘香香脆，仲要加埋黑胡椒就更加惹味。燒芝士三層肉喺肥瘦相間嘅三層肉上面加上好多嘅芝士一齊燒，半溶嘅芝士加上油香四溢嘅三層肉，係極為邪惡嘅組合。 燒蜜糖牛油粟米呢度嘅粟米採用原條燒烤，所以食落更加有風味，而粟米上面搽滿蜜糖同牛油，夠唒香甜味美。燒玉桂焦糖金菠蘿燒菠蘿賣相好吸引，呈金黃色，而表面仲有一層香脆嘅焦糖，而且會再喺表面灑上一層玉桂粉，令味道變得更豐富。