去到見到佢個場而家進行緊Halloween裝飾，繼續搞鬼，睇返個新Menu，好彩我至愛的鰻魚蛋包飯，軟殼蟹pizza，黑芝麻奶嗰啲全部都喺度😝不過見到佢同時都加咗好多新嘅嘢，嗰啲名同樣係玩味十足，我哋一於就試吓啦😋
👉求其是但乜都炸啲啦 （$98）呢個真係次次嚟炸嘅嘢都唔同，好睇廚師嘅心情🤣今次有炸蝦，炸魚柳，炸雞翼同炸薯條🍟依然係炸得好味😋今次佢仲落多咗芝士粉添啊！
👉海鮮拼盤 （$398）見到個樣好吸引，有大大隻波士頓龍蝦喺正中間好吸睛🦞仲有兩隻日本磯燒鮑魚，三隻新西蘭青口，四隻法國虎蝦，兩隻加拿大翡翠螺，都幾新鮮嘅，不過如果每樣都有四隻就好啦，咁我哋四個易分啲🤣我冇得食鮑魚🥹
👉唔好抱咁大期望蒲燒鰻魚蛋包飯 （$125 +$25升級全條）呢個真係每次嚟都必點，冇得輸！大大條鰻魚配滑蛋包飯，每一啖都係幸福🙆🏻♂️好彩新Menu佢仲喺度咋🤣
👉好日梗係芝士龍蝦意大利扁面 （$280）下邊係特濃芝士撈扁意粉🍝味道好香濃，上面係香煎龍蝦尾，爽口彈牙😋
👉 美利堅合眾國草飼牛扒 （$168）我哋本身想點平時嘅牛扒，但係佢而家原本嘅牛扒冇咗，變咗係沙律嗰一版，佢呢個嘅份量牛扒少咗，不過沙律菜多咗，中間仲有兩塊炸蝦餅，同埋配菜入面有個小麻醬烏冬，都幾豐富同開胃😋
🥛我黑芝麻你個奶 （$48 ）依然好飲無敵，次次嚟都必點！
🥛73.5%朱古力最好味 （$48）朋友點嘅，佢嘅外貌升咗級，上面會有一個細細個嘅六格朱古力🍫做點綴，好可愛。
🥛豆腐豆腐豆腐咖啡 ($56) 又係朋友點嘅，上面係一球豆腐雪糕，下面係香濃咖啡，朋友話好飲
🍰紐約原味芝士蛋糕 （$68）本身我哋想點焙茶芝士蛋糕，點知琴日賣晒，我哋點紐約原味一樣好味，芝士味好出好香濃！
🍰茫茫人海遇見你嘅途中夾雜住又甜又酸 （$68）就咁睇名完全唔知係乜嘢🤣睇返英文先知原來係芒果青檸口味嘅雪葩，佢嘅外型好吸引，好似個搖籃咁樣好靚，味道真係酸酸甜甜㗎喎😋
隔咗一排冇黎，佢依然係咁高質，我就食得好開心，新Menu上面嘅嘢都好好食呀，希望佢繼續保持到💪
