軟橋米苔目餐廳 (Moved) New Location

深水埗大家都知道係平民食堂集中地，今次我地去到一間小店食米苔目，認真係黎之前都唔知係點樣既粉麵，但食落幾過癮。呢間店有好多唔同既湯底，其中豬骨湯底係基本湯底，我就叫左一個豬潤雞肉米苔目。米苔目本身質地幾好，食落唔會好粉，有啲似烏冬，本人幾鍾意呢個口感，表面都容易掛湯，所以的確幾好食。之後女朋友叫左個豬潤酸菜，方魚湯底飲落麵幾重方魚味，酸菜同豬潤份量都好多。小食方面係我好愛呢間小店既原因，有好多種類選擇，同時都幾好質素。麻辣鴨肉既鴨肉本身有輕滷既味道，麻辣有得選擇辣度，重點肉質都好彈牙。下一個係台南豬手，豬手煮到好淋好滑，食落好入味，豬皮唔係爽既口感，一樣都係煮到好淋，食落味道好濃厚。骨入面更加有骨髓可以吸食。重點推介係Q彈豆腐，到底係點樣做到呢種咁彈牙既口感，表面有啲辣粉同調味料，好惹味上癮。仲有就係呢到有日本入口既波子汽水，今次試左士多啤梨味，飲落幾清爽。總結小店入面唔會太迫，同時枱面設計好清潔乾淨，有好多餸菜選擇，小食亦好好食，下時經過都可以再次一試。