佢提議左我哋嚟炒餸食飯，一入到去見到師公原隻乳豬燒緊，第一感覺都覺得呢間餐廳應該幾誠意，但由於朋友唔係好食燒豬，所以我哋就冇叫到。
夏日熱辣辣，一坐低梗係要嗌返枝啤酒gur一gur, 值得一讚嘅係呢度嘅啤酒真係超級冰凍，夏天過嚟飲番杯，炒個餸食個飯真係一流。
一嚟到我哋嗌咗隻燒鵝例牌，一上枱見到隻燒鵝就知有板有眼，皮脆肉嫩得嚟，又唔會好似一般燒鵝好多肥膏，肥瘦啱啱好，燒鵝皮又脆，值得一試。
另外因為我好鍾意食雞，所以叫咗半隻霸王雞，一嚟到都見到份量十足，雞肉食得出有雞味，唔會好似啲雪藏雞食到一陣雪味，雞整體上都好食。
飲得啤酒，梗係要食啲餸酒小菜，黃金蝦就唔話得。好重鹹蛋嘅香味，蝦殼炸到到脆卜卜，我自己就連殼一齊食埋，黃金蝦大大隻，肉質又夠爽脆，呢個下次嚟一定係必點！
另外仲有一個鹹魚煎肉餅，一攞上嚟熱辣辣出晒煙，煎到好香脆，每一啖肉餅都食到又咸又香嘅肉餅味，肉質又彈牙，食得出唔會落咗好多份，又係送酒一流嘅小菜。
食咗咁多肉，梗係要炒番兩個青菜。朋友好鍾意食尖椒，所以嗌咗個豉椒虎皮尖椒，我自己就唔係話好鍾意食尖椒，但個豉椒味好香，朋友話尖椒好脆好爽甜，調味亦都好惹味，而我就比較欣賞肉燥炒唐生菜，肉燥有啲似一般平時台灣嘢嘅肉燥飯果種肉燥，送飯真係一流。
整體嚟講，小菜夠晒鑊氣，每一點都熱辣辣送上枱，絕對係有下次嘅餐廳！
