放題分6個價錢，要食到🐄小田A4和牛需要揀D~F餐，小妹就試咗D餐。先黎一大盤舟・盛合，呢隻船係所以set都有嘅，一次過為客人奉上美國跟澳洲和牛、豚肉、雞肉、海鮮同野菜。另外配一個大桶盛（有小田牛牛肋肉、小田牛里脊肉、牛舌同牛外橫隔膜肉），同埋重頭戲🥩小田牛西冷（呢款無得任食）！
1
以寶箱噴住煙咁上台氣勢十足，西冷大大片，油花紋理清淅可見，有牛肉味，肉質都算嫩滑。
基本上叫得D餐以上嘅都係食小田和牛，所以小妹覺得隻船都係打卡為主，唔特別介紹。以下精選幾款小妹覺得必食嘅：
🐂小田牛牛肋肉~ 個人覺得牛肋肉最有和牛入口溶嘅嫩滑感，比寶箱西冷好食。如果鍾意有口感嘅朋友，可以選擇牛肋間肉。
🐃小田牛薄炙里脊肉~ 輕輕火炙表面，好經好香；再蘸蛋汁令肉質更加滑。
🐄大判壽喜燒牛里脊肉~ 小妹仲對上環食個件壽喜燒牛肉念念不忘，呢度嘅質素雖然冇咁正，不過都唔差。大大片里脊肉配甜甜壽喜燒汁，味道唔錯，仲可以任食🤣
👅極上厚切牛舌~ 呢度牛舌都有好幾款有牛舌棒、薄片、加蒜嘅…但小妹最like呢款。比較少放題有咁厚切嘅牛舌，燒到面燶燶地微脆最好食😚
🦐海老~~好多放題嘅海鮮都麻麻，但呢度嘅蝦質素有驚喜。手掌咁大隻，咬落爽口，仲有蝦膏，難得令小妹再返叫
D餐可以食到91款食品，就算每款試一件都飽飽。壽司飯做得麻麻，拌生牛肉都普通，反而和牛刺身可以一試，無腥味，不錯。雖然熟食唔係主角，不過都有待改善；小妹只係試咗餃子湯，味道可以但皮好厚，炸魚仔就好腥😣。甜品Bar嘅蛋糕無論賣相同味道唔合格，不過🍭雪條好好味，而且有好多味道揀，推介栗子紅豆味。
1
店內環境光猛，坐得寬敞，而且小妹concern嘅抽油煙做得唔錯。雖然質素唔差，不過小妹覺得對比起一般燒肉放題貴（仲要唔好彩食個日剛加咗價🙈）。放題另加飲品沙律甜品吧，盛惠$800一位；唔係唔好食，不過和牛嘅級數未到令人😲嘩！一聲嘅感覺，所以小妹可能會揀食到靚和牛嘅燒肉店，貴精不貴多嘛。不過一試無妨嘅，但會建議平日去，慳返半百。
