星海．譽宴 (鱷魚恤中心)

Open Now

Now Closed

好耐冇同媽咪食飯，今晚做個孝順女同佢去鱷魚恤中心，呢度出名中菜多，但媽咪唯獨鍾情譽宴 • 星海，今晚就帶佢食餐好嘅!秋風起，梗係要飲啲湯水補一補，揀咗黑蒜螺頭燉雞湯，每人一盅，湯料非常之多，呷一口，強勁嘅黑蒜味加上螺頭嘅鮮味同燉雞嘅甜味一齊湧入口，香甜又濃郁，媽咪即刻豎起手指公！先叫一個燒味拼盤，叉燒帶著少少脂肪，入口油香十足又唔韌，切雞脾肉又嫩又滑，點上姜蓉最襯；煙鴨胸香味十足，拼盤中間配上酸醋黑木耳，夠晒開胃。媽咪最鍾意食鮑魚，當然要叫返個鮑魚玉環盅俾佢試吓！鮑魚放喺冬瓜環上，配上草菇伴碟，望落成個菜式更有層次，而鮑魚食落帶點溏心，少少煙靭，非常美味！另外點左份西施蛋白蝦球，伴有翠綠嘅蘆筍同紅蘿蔔絲，咸咸地嘅蛋白食落幾特別，蝦球夠大隻又爽彈。呢度嘅福建炒飯真係用料十足，炒飯底夠乾身又夠香，幾乎每啖都會食到蝦肉、瑤柱絲、冬菇、肉丁等等，絕不欺場！最估唔到係連普通嘅陳皮紅豆沙都做得出色，陳皮味香，煲到起晒沙又唔會太甜，好味！不枉我放工即時趕過嚟呢度食飯！