至於呢個位前身就係賣運動用品嘅，估唔到咁細個位都可以開一間拉麵舖，仲要有我未食過嘅沾麵
根據商場 FB 嘅介紹，呢間係新開試業嘅，返正係新舖頭就入去試下啦
如果 Google「一生懸麵」呢四隻字，結果好多都係講緊台南嘅一間同名拉麵店，未知兩者有冇關係
二人同行，被安排坐普通枱，枱面已經放定點餐紙，另外都有紙巾、餐具、杯同埋檸檬水比客人用，不過水入面係冇落冰，而且水溫係偏向室溫，個人覺得有冰水會好啲
今次我就食特濃豚骨沾麵，麵有得揀軟硬度，而我就揀標準嘅，落單果陣職員問我地要熱麵定冷麵，我自己就揀冷麵
另外我地都叫左份煎餃子黎食
稍為等左一陣，首先黎嘅係煎餃子（$25/5隻）
個餃子皮煎得幾靚，有小小脆脆地嘅感覺，唔會成隻餃子散晒，賣相唔差
同埋食落口感覺到有小小汁，唔會話太乾食唔落
跟住就係特濃豚骨沾麵（$68，另加半熟蛋 $9/2隻）
第一次食沾麵，其實都唔係太知咩叫正宗
沾麵汁嘅豚骨味幾突出，個汁本身都幾濃郁，但個人而言唔會覺得太濃，亦都有小小蔥係入面
麵條嘅口感都 ok，我食果個係冷麵，但係食落口又唔覺得好冷，不過鐘唔鐘意又係因人而異啦；因為同行果位揀左熱麵，所以我都有試兩啖嘅，我又冇特別喜好話鐘意熱定冷，不過上網睇就有人話沾麵最好配冷麵，麵條會好食啲
碗麵本身都有一隻半熟蛋，我就另外加左兩隻，不過就覺得略為熟左啲，始終冇果種半熟嘅感覺；至於叉燒同埋荀都不過不失，起碼成碗麵唔會覺得太單調
不過份量黎講我就覺得唔係太足夠，如果大食小小嘅要考慮下加麵底
如果住附近又想食下沾麵，呢間會係其中一個選擇，雖然唔會成日食，但係間唔中食下都得
