1
我一般只會食和式料理時選擇飯類，因為和式煮法冇咁肥膩，一汁三菜便當($150)有漬物三吃、日本極上太白63度慢煮蛋、豆瓣醬燒鯖魚、鰹魚昆布高湯、日本穀米御飯。漬物分別係川味木耳絲、青瓜漬、柚子蓮藕片，蓮藕片非常爽口，木耳絲同青瓜漬酸酸地幾開胃；豆瓣醬燒鯖魚好好食，魚肉肥美多汁，外皮煎得金黃色，外脆內嫩；穀米口感豐富又健康，而且店員上菜時會俾埋張教學紙仔，仲有加湯、慢煮蛋前後兩種食法，成餐飯體驗過程一流。
飲品我地試咗桂花蜜梳打($55)同普洱莓($55)，桂花蜜梳打偏甜帶濃濃桂花香，而普洱莓係帶草莓香嘅普洱茶，我本身鍾意飲茶又鍾意草莓味甜品，二合一當然覺得perfect。
終於到今日主角伯爵茶傳統班戟($85)，一上枱就聞到好香甜嘅蛋香，賣相非常精美，外層食落口感有少少似香蕉蛋糕，係比較實在嘅美式pancake，配埋海鹽芝士忌廉醬、百花蜜同牛乳雪糕，甜中帶少少咸味，旁邊水果新鮮多水份，夾埋pancake食會多一份清甜，最精彩係佢有麻糬夾心，令pancake味道同口感有更多層次。
整體無論賣相定味道，蟲二嘅水準絕對值得我下次再上黎，慢慢嘆件cake。
