加賀真味料理 (Closed)

去開奧海城嗰頭但又唔想喺商場食，所以落咗去大角咀嘅內街睇下有咩好食。附近都有唔少要排隊嘅人氣店，我唔想等位所以去咗旁邊一間唔多起眼嘅日本菜希望食個lunch set。入到去環境都有日本料理小店嘅feel，睇落算乾淨企理。午市定食包前菜麪豉湯只係$70，麪豉湯仲有好多好滑嘅豆腐粒，又唔太鹹啱我飲。店主最後仲送多包紙包飲品，所以都算抵食。我叫咗個經典嘅牛丼。一上到嚟都有啲驚喜，因為個碗同presentation都算靚，睇到都令人垂涎三尺。食落啲肥牛係有質素嘅，唔係最cheap嗰種好韌無牛味嘅雪藏牛。而且我好中意爽口嘅洋葱條，加埋適量甜醬油汁非常適合下飯整體嚟講份量啱啱好，$70呢個lunch set係物超所值。店主似係兩公婆，老闆娘非常nice會同啲客人傾計，相信都累積咗唔少熟客仔。希望下次可以試到佢啲魚生/其他小食