雖然係放題，但佢哋嘅火炙壽司一樣冇馬虎！火炙左口魚邊壽司係必點之選，師傅用火槍輕輕炙燒表面，逼出豐腴魚油，入口即化，個種油脂嘅香味充滿成個口，我一個人KO咗四件都仲想食！另外叫咗啲一品料理，好似蒜香炒蜆，蜆肉夠大隻，冇沙，蒜蓉味香濃撲鼻，醬汁惹味，送飯食一流，我朋友就用個汁撈咗成碗飯！
自助區除咗有各式汽水、茶類飲品，仲有麵豉湯同白飯任裝，絕對唔怕你食。由頭到尾都係咁高效率上菜，完全冇因為我哋坐喺角落或者不停加單而拖慢，可以盡情食足兩個鐘，完全感受到咩叫「出餐速度追得上食速」！對於我哋呢班大胃王嚟講，實在係太爽啦！
