下午茶時間都仍然滿座，店員叫我地等一陣順便可以劃定order紙。
最快到嘅就係我杯特色飲品，好似去咗泰國渡假一樣嘅薄荷青檸梳打，清新涼透心。
跟住我碗九大簋嘅車仔麵送到上台啦！睇到都覺得好正！滿滿的好開心！
最緊要就係揀個特色湯底，我一見到就想食牛腩湯，揀咗小辣，點知原來都真係幾辣！
車仔麵當然個麵好緊要啦！傳統粉面我就揀咗粗麵啦！特別有口感。
車仔麵好少有得食海鮮，所以我揀咗墨魚仔，好鮮甜。
至於車仔麵嘅餸係可以自由配搭嘅，我第一眼就離不開咖喱魚蛋，元朗先食得到呢一種風味，雖然細細粒但係好紮實！
牛腩同埋金錢肚都好入味，並唔係一般嘅質素，係真係傳統車仔麵嘅出色味道。
而我冇諗過車仔麵可以食響鈴真係好得意。
套餐嘅小食我就要左香脆炸魚皮，真係又薄又脆口，配埋秘製醬，特別清新好有夏天的味道。
有營蔬菜 我揀咗腐乳唐山菜，越食就越想食。真係忍唔住要俾個讚！
咁豐富嘅一餐都係唔使 $100，真係好味到不得了！
