鴨仔冰室 (Closed)

大件夾抵食的鴨仔冰室可以話係觀塘返工一族嘅福音 🤩🤩呢度嘅下午茶$50兩份，呢個價錢真係離晒譜！點解可以咁抵架？！😱😱😱另外午餐亦都係$50左右非常之抵食！有多達10至20款選擇，保證有款啱你心水。我哋叫咗「紅酒燴豬仔脾配飯」、「鮮茄芝士焗豬扒飯」、「粟米汁芝士焗魚柳飯」、「沙嗲牛肉煲仔麵配奶油多士」同「鴨仔什扒(包括雞扒、牛扒同豬扒)配意粉」。以上跟餐加$5仲可以配沙律或者餐湯添！今日嘅餐湯係蘑菇湯，有蘑菇香又滑。最欣賞佢嘅沙嗲牛肉煲仔麵。熱辣辣好吸引！裏面用咗韓國拉麵🍜，配埋份量非常多嘅沙嗲牛肉，味道濃郁，夠晒入味😋。奶油多士外脆內軟烘得剛剛好。紅酒燴豬仔脾配飯豬仔脾炆得好腍，啲汁滲晒入肉裡面。另外仲有好多配菜，有青菜同紅蘿蔔，非常健康。「鮮茄芝士焗豬扒飯」同埋「粟米汁芝士焗魚柳飯」兩款焗飯仲係用錫紙兜上，確保即叫即焗，新鮮滾熱辣！加$15仲有黑牛飲。大大球朱古力雪糕配埋可樂，好耐冇飲過啦，非常懷舊呢！