星期六既2點幾，出面都有大概十人排隊，不過同朋友傾下計時間好快過，唔算排好內～排隊既時間，職員就會派發點餐紙，一人一張，每人最低消費$40。我地就各自叫d飯食同小食share!
落雨濕濕 最好叫杯熱柚子蜜飲下。
麻辣魚蛋5粒$20（走辣）因為我唔食得辣，所以以為會食到好普通既魚蛋。點知一咬落去！正！首先外面係炸過好香口，內面係有麻既香味！我超鐘意食麻，以為走辣就咩都無，點知仲保留左麻既味道，好好食啊！加埋面頭既炸蒜真係口感一流
我地超貪心，樣樣都想食，先叫左個咖哩特製豬扒飯$60再追加午餐肉$10，煎蛋$8。咖哩汁係分開上，我覺得咁樣好好，唔會整淋d豬扒之餘又唔會令到d飯濕曬。
先講下豬扒啦，切開有4大條，大過你塊面😂咬開既時候炸果一層唔會太厚，仲脆卜卜，我地坐個位睇到師傅係即叫即炸即切，所以好新鮮，咬開仲有肉汁流出。
豬扒好厚但唔會太硬，好軟好易咬，而肉亦醃得岩岩好，唔會太咸，味道十分好！午餐肉係炸過，又勁大舊，鐘意食午餐肉既真係唔可以放過🤣隻蛋又煎到燶邊又保留返蛋黃唔熟，會唔會太勁！！
我要食既炸芝麻雞翼$28（走辣）有得剔埋走辣呢個選項真係好貼心，岩曬我地呢d不辣之人。雞翼表面超多芝麻，咬落去好香芝麻味，雞樣又炸到好脆，同樣呢間餐廳既腌肉味道我好鐘意，好好食
辣味海蜇$20 食落其實無咩辣味，但夠麻油味 海蜇彈牙，做前菜岩岩好。
1
會再食啊！
