前菜
落咗燒肉order之後，店員好快就上咗幾款小菜（泡菜、薯仔沙律、酸蘿蔔、芽菜）、生菜同埋沙律。除咗沙律，其他都可以refill! 烤盤側邊仲富有有蛋汁同埋粟米芝士，兩樣都係可以refill，其實食呢幾樣嘢都飽🤣好有誠意！
荔枝牛肉串串 $72 有創意，牛肉入面包住荔枝，店員話成支拎上去燒就得。我哋嫌燒得慢，最後都係拆件燒😂 牛肉串上荔枝烤有陣微甜果香，入口鹹甜交織，幾特別！
壽喜燒牛空腹 $88 冇諗過韓燒會有壽喜燒出現，覺得幾特別就叫咗。等壽喜燒汁滾之後，就可以將牛空腹擺入去燒。然後就可以將牛肉撈埋蛋汁同埋飯一齊食。牛肉幾香，壽喜燒醬汁甜鹹惹味，撈埋蛋汁同白飯食都唔錯，如果有埋紫菜就仲正啦😆
熟成黃油雞腿 $125 雞髀店員可以幫手燒。黃油香氣濃郁，烤到皮脆肉嫩。
王者牛肋骨 $298 出色！（都係可以搵店員幫手燒）牛肋骨厚肉多汁，烤得外焦內嫩，牛肋骨醃過，味道出，配埋生菜、大蒜、辣椒等等一齊食，好味！☺️
肉肉蛋糕（生日優惠） $0 朋友正日生日，早幾日book枱前講定，餐廳會有個生日優惠送肉肉蛋糕同埋海帶湯😆（唔記得有冇指定消費）。蛋糕其實用牛肉砌成蛋糕形，賣相都好可愛啦，大人細路見到都鍾意！仲要肉質都唔差，燒到好香又Juicy🥰
手打鮮橙茶 $48 鮮橙茶用新鮮橙搾汁，仲有西柚、青檸等等材料，飲落清新酸甜，大杯又解渴！
菠蘿梳打 $38 爽口，菠蘿味濃郁，都好襯韓燒。
衝刺到底小跑車兒童套餐 $168 叫兒童餐會包埋入兒童室嘅遊戲券同埋一個扭蛋。我哋叫咗呢款跑車兒童餐比小朋友食（製作時間預大概10分鐘）。呢個餐包括玉米，腐皮紫菜飯、西蘭花、火腿同埋炸金絲蝦。我覺得都算兼顧埋營養嘅，叫做有啲菜呀嘛😂 兩舊腐皮紫菜飯size都大舊，份量會夠一個小朋友食（我地仲有燒肉呀嘛）。火腿仲要𠝹得好靚，有pattern，唔係一片過咁簡單，幾有心思。味道都有調節過，唔會好鹹👍🏻 送埋波波池入場券，當去playroom咁，小朋友食完即刻去玩！😂
賣點
🫰超大波波池同遊戲室（記得要叫兒童餐）
🫰環境-韓屋設計氣氛好
🫰生日優惠有誠意
🫰店員友善，餐單有心思
唔算近地鐵站，但接受到
好味度：8.5/10
