叫左黃咖喱牛腩，咖喱夠晒香，味道都幾正宗，牛腩炆得入味好淋！薯仔都煮到入曬味，加返個白飯撈埋汁，推介！
泰式鮮蝦炒金邊粉，即係Padthai，去親泰國旅行都一定會食呢個！原來係香港都食得返個風味！大大份炒得乾身，唔會好油膩，大蝦好新鮮爽口，配料有豆腐乾，蛋絲，花生粒，口感豐富，都幾ok！
另外叫左菠蘿海鮮炒飯，粒粒分明，金黃色既炒飯，應該係落左薑黃粉，賣相唔錯，入面有蝦、魷魚、帶子等既配料，都幾多下！味道不過不失～
仲叫左大大嚿既炸蝦餅🤩口感彈牙，食落唔粉，有濃郁蝦味，愈食愈鮮甜👍🏻食呢個要狂點泰式甜辣醬，夠晒滋味！
最後係最岩大熱天時食既酸辣鳳爪！酸酸辣辣好開胃，但係味道偏辣，下次要叫返少辣先得！鳳爪係無骨，真係啖啖肉好正，亦都夠厚肉🤩
係香港都食到呢個質素，真係算唔錯！🥰下次會再幫襯✨
