Ching Kee Restaurant

已經第三次幫襯！頭兩次都極為失望，諗住貪新鮮同朋友入去食下午茶，點知等好耐都唔出，三催四請先至上菜，出到嚟個奶油豬仔包係我成二十幾歲人食過最難食最唔抵食！空氣麵包，好似花園餐廳嗰種，基本上一啖食晒收我幾十蚊！有次食晚飯，見冇人幫襯好多位，可以成間餐廳霸晒所以入去試吓，食完成班人都講晒粗口，又貴又唔好食，難怪之後間餐廳淨係做午市做地盤佬生意！

今次係冇選擇，行完山超級肚餓所以俾多次機會佢。我住響附近嘅朋友話基本上餐廳平日10個有九個半都係地盤佬，因為免費泊車，出面好多地盤車出入，沙塵滾滾，記住唔好坐出面！星期日會好少少。朋友仲話夏天呢度超多蚊，咬到Pk，又多地盤臭汗味，所以夏天一定唔幫襯！

至於食物方面，非常之一般，越來越差，差過普通茶餐廳水平。啲肉好大浸雪味，啲飯好硬（聽隔離枱話上次啲飯係漿糊咁！ ）我朋友話之前好似有少少好轉，但係今次真係非常差！唯一吸引之處係可以泊車同埋帶狗狗入去，不過屯門好多地方都可以。

我食咗三次加埋朋友久唔久幫襯，大家嘅結論係：食物質素參差，環境欠佳，價錢偏貴，似乎唔係做我哋一般人生意而係做地盤佬，今次真係最後一次，寧願坐番車出去屯門，一樣價錢或平啲，仲多嘢食仲好食！