老闆娘呢個名喺米線group曝光率極高，終於有機會拜訪下，時為星期二晚上未夠7點，等15分鐘有得入座
被安排到一間細房，有冷氣，啲枱凳地板幾光鮮又無表面污漬，唔係傳聞中咁污糟，咁當然喺正舊街市唔好期望有幾乾淨啦，食住嘢地下有隻小強喺腳邊行嚟行去，我哋嘅底線係佢唔飛唔爬上嚟都接受到，所以專心食麵唔四圍望其實相安無事嘅
1
店員態度唔係傳說中咁差，安排得好有系統，問多句會耐心解釋，攞住筷子桶繞房一周叫大家攞筷子..以街坊小舖來講都算係咁
1
食物方面喺入座前已經落好單，當晚無酸菜牛肉同豬軟骨，風聞炸物出色，我哋都嗌好多炸嘢
1
嗌咗炸雞球、炸鯪魚球、蝦膠豆卜+腩肉，
強烈推薦炸雞球肉質鮮嫩多汁；炸鯪魚球都食得出有細碎魚骨唔係淨得粉，不過略嫌唔夠彈牙(可能咁先好?!)；
蝦膠豆卜，蝦膠做得幾好，但豆卜酥脆到已經無咗豆卜嘅原形，好似一堆包裹住蝦膠嘅炸粉，男友愛食炸嘢就好欣賞，我就麻麻；
最後都強烈推薦豬腩肉，好似南乳炆肉咁煮嗰陣迫曬豬腩肉啲油脂出嚟，食落一啲肥膩感都無，取而代味係入味且鬆軟嘅口感
1
米線偏淋但夠滑溜，湯底部分我哋一碗嗌咗麻辣小辣，另一碗要麻酸辣BB辣，唔知點解，食嗰陣覺得麻酸辣BB辣嗰碗更辣更麻，睇嚟辣度唔影響麻度，而且越食越麻食到最後仲有啲苦苦地，就算我平時食開酸辣都覺得酸得嚟麻麻地
反而麻辣嗰碗冇咁麻，更加飲得出湯頭嘅鮮甜味，只飲咗幾啖可樂，一直隔咗幾個鐘返到屋企都未口乾，唔算味精
埋單$57一碗兩餸，$6一罐可樂，價錢喺米線界嚟講算貴，餸嘅味道亦唔係款款都咁超班，算係不過不失，唔會專登去，但經過附近想食米線會再嚟
