真秘鍋 (Closed)

朋友好耐冇見想聚下，一行八人訂咗VIP房。經WhatsApp訂位，餐廳人員回覆得都好快，仲send相俾我地揀房，服務態度唔錯。餐廳有好多種唔同大細房間，最後我哋俾咗$1000訂金，揀咗間$4000最低消費嘅圓枱房。房間有兩個爐位，但係我哋主要想唱K飲酒，所以只開咗一個鍋，揀咗玫瑰花膠雞拼藥膳魚頭湯底。靚女侍應姐姐介紹打邊爐前一定要試吓飲碗招牌湯底先，用足真材實料熬制，果然好香濃，飲完亦都唔口渴，應該好似佢哋咁講冇落味精。兩款湯底每人都各飲足一碗。刺身我地點左原條象拔蚌，冰底上夠凍好鮮甜，不過影唔切相一嚟到就俾大家食晒啦。肉類方面我地點左一個有齊牛、豬、羊嘅拼盤，擺盤好精緻，肉類質量都高。朋友鍾意食豬，另外帶咗一個玫瑰松阪豬，整成玫瑰咁嘅形狀，好食得來夠靚可以打卡。餃子拼盤係餐廳手工自家製，其中竹笙餃幾特別，清清地唔錯。即炸響鈴亦都炸得酥脆。之後朋友加點左唔少火鍋配料，但係大家已經開始飲到興起就冇影相啦。八點入座玩到凌晨兩點大家食飽飲醉，盡興而歸，VIP房最低消費價錢唔算平，但以呢個食物質素，加埋可以唱K飲酒成晚唔使轉場，除翻開人頭朋友們都覺得係幾抵。