作為一間中式私房菜，名門店面冇一般酒樓咁大，店內亦有少少歲月痕跡，不過都無損佢嘅吸引力，平日夜晚都有大半滿。佢地嘅菜式都好多選擇，但有唔少特式菜因為耐唔耐會轉，所以冇列喺餐牌入面，訂座時餐廳會whatsapp一份俾客人，而部份菜式就最少要一日前預訂。
招牌焗釀響螺($168/杯) - 哩款係預訂菜式，留意哩類以位計嘅菜式都係兩位起。雖然話係焗釀響螺，不過菜式其實係用杯上，師傅將響螺、洋蔥同磨菇切碎再放喺杯入面焗，比起釀返喺螺殼入面更方便食，上枱時香噴噴，食落好有咬口，食時可以加少少喼汁吊味。
醬爆黄金蝦多士($88/件) - 蝦多士同樣係預訂菜式，需要至少早一日預訂同最少兩件起。蝦多士上面堆滿左超多咸蛋黃醬，咸蛋黃味超濃郁勁邪惡！
蝦多士食落幾脆口，中間蝦肉好結實彈牙，多士底另外仲加左隻蝦，口感比一般蝦多士豐富。
順德煎釀鯪魚($178) - 哩道菜就咁睇冇乜特別，但睇真啲鯪魚係預先切開左一件件，師傅會先將鯪魚拆肉起骨，再打至起膠釀返入鯄魚皮入面，一般上枱一碟煎釀鯪魚實際係用多過一條鯪魚去整，真係少啲功夫都唔得。
魚肉食得出鯪魚香味之餘又冇碎骨，魚皮煎過帶少少微脆，幾好食。
招牌哈哈哈芥蘭煲($178) - 哩個芥蘭煲用左蝦球、蝦乾同蝦醬落去炒，蝦醬鹹鹹香香好惹味，蓋左芥蘭本身苦澀味之餘但又唔會太鹹，好啱要黎餸飯，蝦球同蝦乾份量都好足料，對得住個價。
總結，價錢雖然唔係特別平，但全部都係功夫菜好花心機同好足料，喺出面唔係好多地方食倒，而且服務亦好好，侍應好主動亦好頻密換碟，抵讚！
