搭電梯上到火鍋撚個層，都未坐低，已經聞到好香嘅麻辣味
一坐低，即刻點個湯底先。
我地點左個雙拼湯底：秘製麻辣鍋（小辣）拼酸菜白肉鍋
個麻辣鍋好有台灣風味，好香，味道幾濃，仲有好多鴨血同蜂巢豆腐！鴨血口感好軟嫰，一啲都唔腥；蜂巢豆腐吸晒湯底嘅味道好好味，而且鴨血同埋蜂巢豆腐都可以免費添加
個湯一開始唔太辣，但煮煮下會愈來愈辣，真係會食到出汗
酸菜白肉鍋味道更好，酸酸地好開胃，白肉比較多肥肉，但夾埋啲酸菜一齊食真係好正，如果酸菜同埋白肉都係任加嘅！啲酸菜真係好好食，又腍又唔會太酸，我哋加左兩轉，早知唔使叫蔬菜籃
落單之後當然要做打邊爐嘅指定動作：混醬！
之後火鍋料好快就到，馬上可以開動
兩個女仔食一碟大嘅手切肥牛都幾誇張
不過碟牛肉真係好正！手切肥牛有質感，食落真係好嫰滑；脂肪分布好均勻，牛嘅味道好濃
根據指示，灼8秒食就啱啱好！
呢碟鴛鴦雙蚌幾抵食，$118已經有兩款海鮮，雖然每款份量唔係好多～～
兩款蚌口感都好爽脆，不過我覺得貴妃蚌比珊瑚蚌鮮味！酸菜白肉湯灼海鮮會比較好，唔會掩蓋咗海鮮嘅鮮甜
打邊爐當然唔少得食響鈴！
呢碟響鈴可以就咁點甜酸醬食，又可以灼3秒先食！就咁食真係好薄好脆；灼3秒就吸收到湯嘅精華，真係各有各滋味
仲叫咗碟鵝腸
可能因為佢叫肥美鵝腸，真係有少少肥，非常邪惡！爽口嘅鵝腸放落麻辣湯度灼兩下，唔任何醬料都好食
呢度嘅手打丸好有驚喜
外表平凡，但內有乾坤！
每粒丸都爽口彈口，手打蝦丸同埋花枝丸味道好鮮，真材實料，同平價貨真係無得比
流心鹹蛋黃豬肉丸真係第一次食，平時我已經係黃金菜式嘅fans，呢粒丸真係啱晒我口味
蔬菜籃顏色好鮮艷，睇到都覺得好健康，不過因為食得太多酸菜，個蔬菜籃浄係食咗d木耳同粟米
埋單之後送兩杯腐竹糖水沙冰，裝住啲沙冰個鼎幾特別，不過味道就甜咗少少。
今晚嘅食材樣樣都好新鮮好味道，湯底同埋手打丸最有驚喜。雖然少少貴，但物有所值，而且台式湯底真係唔係度度有！下次打邊爐可以encore火鍋燃
