一入去以農家裝璜， 而且坐位寬敞乾淨企理， 俾人好舒服嘅感覺， 有一面牆壁上嘅特色壁畫更係打卡位啦， 另一邊牆上仲講明無味精嘅堅持，好期待喔。
佢地主打係紅繞牛肉麵， 但今晚我地選擇打邊爐，六両三推出3款一人火鍋套餐, 蔬菜養生鍋/牛骨沙茶鍋/藥膳麻辣鍋, 我地都食唔到辣, 所以咗選擇蔬菜養生鍋同牛骨沙茶鍋 . 每個火鍋套餐都包一份肉盤， 3款台灣好丸， 一份蔬菜盤同1份粉麵， 而且每款選擇都很多。 蔬菜養生鍋以粟米同白蘿蔔做湯底， 好清甜喎， 牛骨沙茶鍋就好濃郁， 對比好大， 哈哈~
肉品其實都好多選擇，鹿兒島豚腩肉/鹿兒島豚梅肉/澳洲M7和牛後腿肉眼/澳洲草飼M2牛頸脊/澳洲和牛牛面肉/澳洲M5肉眼蓋， 我就選咗鹿兒島豚梅肉同澳洲草飼M2牛頸脊， 份量都唔少喎， 而且厚度適中， 特別鐘意牛頸脊， 夾夾地又有濃濃牛味。 台灣丸類都有驚喜， 尤其係那粒流心丸裡面嘅咸蛋黃。
飯食除咗有台灣粗麵同關廟麵選擇之外， 竟然仲有王子麵， 我就選擇咗冬粉， 吸哂濃郁嘅沙茶湯好惹味。 食台式食品點少得珍珠奶茶呢。
最後我地仲叫咗份黃金地瓜條， 外脆內甜， 當小食又可當甜點， 太滿足啦。
