老厝邊

Open Now

Now Closed

大角咀埃華街附近一帶嘅幾條街，近年開咗好多不同種類嘅食肆，所以就今日就約埋大角咀返工嘅朋友試新嘢兼敘舊，就嚟咗老厝邊。店內嘅裝修都花咗點心思，帶點台式風格。台式餐廳當然唔少得台式牛肉麵，仲有唔同款式嘅台式小食同埋台式飲品，選擇繁多。仲有超人氣推介，精選咗八款食物特別推薦俾食客，選擇困難嘅朋友可以縮窄範圍。食台灣菜點少得珍珠奶茶，朋友就揀咗珍珠烏龍奶茶，珍珠夠煙韌，配埋烏龍茶底茶味夠濃郁，有傳統味道之餘又帶點新鮮感。身為芋頭控的我當然會叫返芋頭鮮奶，入面有好多小粒嘅芋頭，飲落非常有口感，而且甜度適中，非常推介！另外仲試咗呢度嘅超人氣推介—超濃芋泥蛋餅。蛋餅入面捲着芋泥、芝士同肉鬆，芋泥打得超幼滑，芝士有拉絲嘅效果，而混入埋肉鬆將成個蛋餅增添色彩。麻醬涼麵賣相非常繽紛，包括有黃色嘅蛋絲、橙色嘅蘿蔔絲、同綠色嘅青瓜絲，涼麵再混入麻醬，夏天食感覺一流。牛肉麵真係值得一讚，佢嘅牛肉又大塊又厚身，份量仲要唔少，麻辣辣到適中，不過唔食得辣嘅朋友就建議食返紅燒，麵質亦都彈牙，連湯一齊食非常惹味。眼見呢間老厝邊都幾受年青人歡迎，亦不乏一家大細嚟幫襯，足以證明香港人真係好懷念台灣嘅美食。