呢間係做外賣多既，配合返上環啲OL啦
夜晚六點半嚟到，見到收銀台面一袋二袋好多袋咁擺住，應該係啲人打電話訂左先，然後返工/放工先直接過嚟攞，係方便的外賣店～
嚟到嗌左之後，都好快整好，本身以為會要啲時間，點知幾分鐘就有得攞😙唔洗等～最討厭等～
紙袋好隔熱，搞到我一開始仲以為係冷麵嚟🤑攞返公司，諗住做完少少嘢可以開餐，攞嗮啲嘢食出嚟先發現菜同拌麵都好有溫度🥰
啱啱準備開餐，老細就急call要去做嘢，忍痛同嘢食講轉頭見，點知一轉頭就已經三個鐘頭後先得閒食😫
返到嚟，最驚喜係嘢食就咁擺係有冷氣嘅office居然仲有少少餘溫！！！但係我鍾意熱食，同事幫手叮熱左，順便打開新世界大門：紙盒可以入微波爐叮🔔！
講完咁多廢話，正式開餐
私房花雕雞拌麵（粗麵）🍜$78
花雕雞雞肉嫩滑，啖啖雞髀肉，一共有7塊左右；酒味淡香怡人；最驚喜係粗麵依然保持有咬口，仲有花雕酒既香，同麻油醬油等既味，雖然因為放得太耐，啲麵得底嗰啲有色，面嗰啲冇上到色，但係無阻麵真係好食！溏心蛋又係非常出色！！！我好鍾意最期待既擺最後食，呢半隻溏心蛋冇辜負我對佢嘅期望！開心～🥳
睇番人地食評先知有得免費加麵底，照我嘅大食程度應該會想加加加！！！（其實唔加都夠曬）
生菜🥬
爽脆，啱啱好彌補返平時出街食唔會有既纖維，同埋生菜份量都唔少，唔係平時碗邊多兩條嘅份量
鮮奶抹茶🍵$35
放得太耐要瘋狂搖勻再飲，因為冰塊🧊都溶曬，所以味道略淡，但係唔會太失望，始終係我自己嚟唔切品嚐最好的它😖
🥢總的來說～
係好味既套餐，信德中心嚟講，你唔想日日食嚟食去都係茶餐廳/連鎖店，想追求有要求嘅一餐，老媽拌麵係一個唔錯既選擇，之後有機會都會再試下其他既口味～
