朋友推介古法羊腩煲，其實我平時唔係太食羊肉，怕佢陣羶味，但係呢個汁煮得好出色，所以我都食咗好幾件，最鍾意就係佢啲支竹，索晒啲汁好好味。
之後打邊爐就點咗手切本地牛肉，分量超多，鋪滿隻碟之餘仲會疊咗幾層，靚雪花又有肉味，正！
手打蝦滑都好彈牙，入面仲混有一粒粒嘅蝦肉。
白灼八爪魚粒又係值得推介嘅菜式，撈咗秘製醬汁，再加啲芫荽，送酒一流。
夫妻肺片同樣惹味。
生菜都好新鮮，配羊腩煲嘅汁真係正到不得了。
最後就點個紅糖糍粑做甜品，雖然呢度唔係做川菜，不過味道同樣出色。
原來呢度7:30前埋單有八八折，唔怪得朋友咁早拉我過嚟啦。
