第一個特色菜不得不提佢嘅火山排骨，點火儀式幾有氣氛，3舊骨大大份，兩個人都未必食得哂。骨髓彈牙又有膠質，肉質鬆軟，非常入味，調汁微酸微辣，十分開胃，廚師用咗香茅、薄荷入饌，令本來會好heavy嘅排骨易入口，食極唔膩。
另外試咗佢嘅優惠菜式：蟹肉蟹膏炒蛋配薄餅，蟹肉結實、份量十足，炒蛋唔老；薄餅有牛油香、煙韌，食落都幾滿足，加埋炒蛋有特色。
另外叫咗佢個蝦醬通菜，唔會太咸，幾大碟，通菜爽脆，咬落過癮。
然後有鹽燒馬友，呢個真係唔係到到都有得食，唔腥、入味，醬汁辛口，有青檸香，十足開胃，陣陣鹽香滲入魚肉，同平時蒸魚唔一樣，但魚肉都幾鮮嫩、值得一試。
餐飲方面叫咗佢嘅招牌芒果沙冰，芒果味濃；椰汁沙冰，清雅，唔會太假。
