交通非常方便，係太子站D出口行兩分鐘就可以到達。本來係想食下午茶，但係尼到呢度既時候只係2點幾，原來下午茶時間係3點開始~ 但都無妨，一於試下呢度既lunch。
餐廳環境都幾靚，以啡色系為主。牆上貼左一啲雨傘運動的支持字句。一坐低，侍應就遞左檸檬水比我地。
lunch都幾多選擇，一共大約有10個set左右，食物種類多: 包、沙律、pizza、焗飯等等的都可以選擇。我地叫左照燒野菜烏冬($45)、忌廉汁火腿吞拿魚焗飯($48)同埋TC薄餅($55)，其中Pizza跟餐送餐湯，我地揀左雜菜湯，好快就送左尼，仲有一塊蒜蓉包，兩者味道不過不失。
另外，等餐時間略長。
2
凍朱古力: 跟餐送的凍朱古力，上面有超可愛的小豬圖案! 唔捨得整散佢
味道不太甜，好濃的朱古力味。而且唔會有冰粒係入面佔晒啲位同埋分淡左陣味，讚
1
薄荷朱古力: 跟餐+$4，朋友點既。不得不說薄荷同朱古力陣味好夾，又係唔太甜，好飲!
TC薄餅($55): 餅底係薄既酥皮，對於我呢種唔太鐘意厚底既人尼講呢款Pizza真係好正
好重芝士味，而且分好晒一舊舊容易食。店員亦有主動問洗唔洗比碟我地share尼食
照燒野菜烏冬($45): 好濃照燒汁味，每一條烏冬都入晒味!
朋友覺得太甜，仲講笑問係咪一碟用一枝燒汁 不過我覺得幾好味呀。
唔太滿意既就係店員落錯單，送左兩碟野菜烏冬尼問我地介唔介意...但慶幸野菜烏冬都合我地口味因為都等左一段時間，費事要再等換餐，所以都照食。我地坐左兩個鐘，期間店員都有主動添水，值得一讚店員既服務態度都好好~ 最後$149埋單，唔洗加一，每一除返開只係$48，非常抵食，而且約三五知己來一聚，真係一個寫意既下午。
