星期日未到中午12點午飯時間，諗住早啲黎唔使等，點知店家已做緊好多單，仲有幾個客人企喺門口度等緊。
價錢咁吸引，難怪咁多生意。新開張優惠價$32一個飯，如果無優惠其實都只係$38，咁平仲可以去邊度搵！
啖啖肉泰式鹵豬手飯
豬手既份量同肉既比例相對頗多，肉質軟腍唔癡牙，皮質黏糯有膠質，要補充骨膠原就岩哂！
無骨海南雞飯
雞肉真係嫩滑，雞皮爽口，個酸辣醬汁好好味，勝過唔少大舖！
兩個油飯份量好多，肉量亦都唔少。加兩蚊仲有椰子雞湯，清甜無油，好飲之餘仲有湯渣紅蘿蔔同粟米可以食。
叫飯餐真係飽肚又好味，見到佢鋪面個凍櫃仲有好大枝楊枝甘露，仲有小食餐牌，想下次試埋。
咁平既價錢，但有咁高質素，真係抵到一個點！一定會推介比朋友同encore!
