今次經過九龍灣攞蛋糕，順便去試依間新開既「大渣哥」！
依間野黃到癡線，仲講明只做香港人生意。入門口前有店員先幫你量體溫同核對身份症，確保入面唔係手足都係香港人。
喺咁既肺炎時期，真係比左好大安心。
下午５點半去到，店內未坐滿（有空位擺下袋），仲有下午茶餐供應。但我都係想食下啲佬飯😂
咁啱當日比朋友去左食光榮既蔥油雞扒飯，比佢燒到我都想食。
蔥油雞扒煎蛋飯（跟餐飲） $63
1
癡左線，我真係唔知雞扒飯原來可以咁好食😭😭😭
佢個雞扒係外脆內嫩，真係脆到個皮咬落有聲果隻，嫩滑既雞肉加埋啲皮脂黏黏糯糯咁，正到傻！
隻蛋流心，啲米乾爽好食，樽秘製鼓油簡直世界級，入口甘香濃、有層次，仲任你加！
杯茶幾好飲，飲得出個茶底唔錯。
不過啲檸檬好多，篤左幾下都幾酸。
聞到枱離杯啡幾香，下次試下咖啡先。
本身心諗死喇都唔知食唔食得曬。
結果食下食下，實在太惹味，竟然比我爬曬成碟飯，不得了不得了。
雖然係茶記，但用餐環境衛生又舒服，啲夥計又好有禮貌同注重清潔，成餐食得好舒服
茶記既味道，五星級既享受
