有時夜晚行過，因為泰笠碰門口係小巴站，成日見到有人邊等車，邊買隻$10 雞脾醫肚，串燒都有，應該幾多熟客。
今日去食午飯，叫蝦醬炒飯加酸辣豬肉湯；個湯底同冬蔭公一樣，係一個加蝦、一個加豬肉。飲啖湯，好正！夠味，酸辣平均，飲完真係會出身汗，好過飲去濕茶！
蝦醬炒飯係我至愛，呢度因為即炒，所以熱辣辣！蝦醬味唔太濃，不過好足料，有臘腸、有細蝦米、有蛋、有辣椒仔、仲有泰菜有辣時必配的兩片青瓜。
炒飯最重要乾身，佢做得到！唔覺唔覺成盒食晒，好滿足。水準以上的一湯一飯收費$33，抵!
以前我仲試過無骨海南雞飯，又係一流水準。
係呢度食要有耐性，因為家庭式作業，真係等好耐，要食好野，無法喇，等緊個陣咪整串串燒先囉！
