自從無喺觀塘返工之後都好小去觀塘食野，後尾見到網上有唔小人讚依間名為「拿督星馬大飯店」嘅餐廳，而我居然無食過又無聽過! 但可惜嘅係佢只做平日早午市，由於要返工所以一直都無機會食到。去到前排有假放，就衝左去試喇!
餐廳位於觀塘碼頭果邊嘅熟食中心上層，其實都係一般熟食中心格局，店內擺設左唔小新加坡人嘅照片，同店內文字嘅設計都好有風味。
食物方面叫左個我朋友推介嘅豬頸肉娘惹叻沙($47)，個麵底你可以簡要米粉、油麵、摻摻、沙河粉，而我地就要左摻摻，摻摻其實即係油麵加米粉，兩款麵無論粗幼、口感食落都完全唔同。個叻沙嘅沙底會有小小辣，有時係香港食叻沙會有好重椰奶味，但依間就無乜，但個豬頸肉真係令人失望😫，首先唔淋，而且好乾身，似係食緊一舊無肥肉又乾嘅叉燒咁.. 但除左個豬頸肉之外其他係唔錯..😕
另外叫左個黑豉油干炒撈粗麵($42)，落單嘅時候因為我同朋友都鐘意食豬頸肉所以依碟都係同一款肉，至於個麵就不過不失啦，同一般荼記差不多，但個豉油同我地一般食開嘅唔同，好似會甜啲，但依個麵相對上會比較油。
另外我跟餐叫左個薑汁拉茶(+$5)，又幾好飲👍🏼😋，薑味岩岩好唔會太少，但陣味又薑得黎味味地，可能本身南洋奶茶都比較甜，所以兩樣野加埋就異常地夾。
另外朋友叫左山楂冰，試左一啖個味道幾清新。
總括嚟講如果我喺觀塘附近返工偶爾食下都可以，但就未必會專登去食，另外留意返餐廳因為係熟食中心所以感覺都有小小唔係好乾淨。
