我地預約左7點，未到7點已經去到，由於非常多人嘅關係，大約7點半左右先可以入坐
我地一行5人被安排到4人坐位，有點迫，但無損雅興，馬上開始點餐
係出面等嘅時候已經見到燒蟹蓋非常之吸引，所以諗都唔洗諗就叫左4隻原味
蟹味噌甲羅燒$68/隻
未食淨係睇賣相已經非常吸引，蟹膏加埋鵪鶉蛋，蟹肉，蟹籽，十分鮮味，但如果淨係食蟹膏的話會有啲“漏”，所以就叫左一個白飯share，加埋蟹膏一齊食就一流
焱丸活貝大盛$368
2隻鮑魚殻燒$68/隻
赤蝦鬼殻磯燒$60/隻
赤蝦燒到岩岩好， 肉質彈牙，好鮮味
但個殻燒到有少少燶左，食嘅時候唔小心就會痴晒落啲肉度⋯
鮑魚非常新鮮，燒嘅時候仲識郁，職員會幫忙將鮑魚去腸同剪開，方便進食，鮑魚都燒得岩岩好，唔會變左擦子膠
雪場蟹磯燒$168
雪場蟹磯燒就比較失色，由於場內爆滿，職員不停咁去各枱幫忙燒海鮮，因此忽略左我地啲蟹腳⋯全被燒乾了
完全食唔到雪場蟹應有嘅鮮味，只係食到乾左嘅蟹肉，同埋以$168呢個價錢一隻腳都唔夠，有啲失望
松葉蟹膏帆立殻燒$80
海胆帆立殻燒$75
醬油木魚帆立殻燒$75
因為焱丸活貝大盛只有2隻帆立貝，所以我地就加叫左3隻唔同味嘅帆立貝，但唔知點解，有味嘅比起原味嘅細隻好多，個肉比起原味起碼細一半，但個肉就有味款係好食啲，比較新鮮及彈牙，而原味唔知係咪因為我地叫左好多燒海鮮嘅關係，放得耐左所以啲肉有啲霉霉地嘅感覺，好失望
刺身5盛$280
除左海胆之外，樣樣刺身都好新鮮，海胆顏色偏淡黃，有啲唔係咁新鮮嘅感覺，食落冇鮮味，仲有啲怪怪嘅味道
海胆軍艦$100
軍艦嘅海胆味道比刺身5盛嘅較鮮味，亦都冇怪味， 但顏色都係偏淡，價錢都比較貴
特上壽司盛合$338
都係除左海胆之外所有壽司都好新鮮，好好味
炸牡蠣吉列$80
由於我唔食蠔嘅關係， 所以冇試到，但同事話好味
活海螺$180
活海螺非常新鮮，食落非常爽口，必食
炸魷魚大盛$68
呢個炸魷魚出奇地非常好食，但得5舊，一人一舊想食多舊都唔夠，炸粉唔厚適中，魷魚唔會過火咬唔開，點埋沙律醬一流
總括黎講大部份海鮮都好新鮮，除左海胆之外
