早於Openrice訂座怕冇位，點知最後無意中包左場
出發前睇其他食客差評都有D擔心會唔會中伏，但見到每個差評下餐廳都有認真回覆，
而且睇食客們D打卡相由2023年到2025都有幾大變化，
加上於訂座當日餐廳有whatsapp溫馨提示教我地點樣去，頓時覺得間餐廳係用心經營所以都抱有期待。
去到門口就幫我地開門之後就安排入座，枱面有本好大本menu，我地先睇單點有咩食最後先睇Set
如果menu字體大小小會好D，同埋個價錢有小小難睇我都睇左陣先睇到
佢地有兩個Set，我地各叫左一個，分別係八道同十道
因男友要揸車唔飲得酒所以叫左杯Mocktails - Sexy On Tree，可惜未影完相就爆左。
第一啖覺得有小小似梅子酒味，但飲飲下覺得有D似飲緊維生素。
我就叫左杯紅酒，原來係L'AMOUR自家紅酒黎，飲落覺得好純好清，我唔識點形容，同出面餐廳飲開的好大分別。
全程都一直聞到酒香，男友一直拎黎聞（自問唔識品酒而且平時都比較少飲酒）
帶子刺身頭三塊我覺得味道一般略帶一點腥，但去到最後一兩塊個味幾清新加返分
生蠔配三文魚子都唔錯，可以唔洗加檸檬汁，個泡沫帶有小小鹹味
法國傳統有機慢煮雞胸沙律, 雞胸真係值得一讚，一D都唔鞋，暖笠笠雞胸配上沙律菜幾好食
法國傳統有機雜菜沙律, 好多椒籽配沙律菜，同雞胸沙律相比有點遜色
法國特級鵝肝蛋撻, 先食啖蛋, 一入口就食到鵝肝味之後蛋味再慢慢滲出黎，最後又有返鵝肝味
撻皮係牛油皮都做得好出色, 但兩樣一齊食撻皮牛油味會蓋過左鵝肝味
法式活澳洲龍蝦濃湯, 龍蝦肉幾彈牙, 湯味道都飲得出有蝦膏味
法國特級鵝肝多士
, 一入口已經好滿足, 好好食
特式立鱗魚好特別, 肉質有少少咬口, 夾埋三文魚籽食可以帶出到彼此味道, 但略嫌淡味道左少少
日本A5頂級飛驒和牛肉眼
, 差不多可以話入口即溶, 牛味十分出色，肉汁滿口都係
法國鵝肝日本A5和牛肉眼
亦都可以稱得上入口即溶滿口都係牛油，鵝肝比和牛搶走了風頭
烤法國特級無激素鵪鶉, 初初以為類似乳鴿咁, 但食落有點似雞肉 冇油滲出, 不是太特別
黑松露帶子薏米飯
最欣賞佢地個飯, 無論係貌相定味道都絕對係MVP
個薏米飯好特別而且吸收哂黑松露味, 帶子上配有一片黑松露同魚子醬, 黑松露片好甜味道好濃郁
帶子煎得恰到好處，有咬口但又唔會過份左
2
法式紅酒燉梨雪葩, 雪葩帶有柚子味同有果皮但美中不足係個梨味道唔太岩我地
日本原隻海膽雪糕
乾冰圍邊淋水後仙氣十足
每啖都有海膽味, 估唔到雪糕同海膽可以咁夾, 大家唔會搶左大家個味
因為生日最後埋單時仲送左支佢地自家紅酒比我地
依餐生日飯整體黎講真係好滿足. 會再回頭
