Sea Dragon King

話說已經三年冇去過長洲，明知俾人劏都要入去食下海鮮。因為食過北社果邊既大排檔，所以就試下食大banner既海龍王。

我地叫左一個$298套餐，有芝士焗龍蝦、油泡象拔蚌、酸甜炸海魚同鮑片扒時菜。上菜的時間很快，可能一早已經做定。

芝士焗龍蝦

芝士焗龍蝦的賣相也太頹了吧...其實味道OK的。好在我地係叫套餐而不是單點。單點盛惠$238，但龍蝦的size比起我自己在街市買的急凍龍蝦細好多倍。

油泡象拔蚌

油泡象拔蚌的賣相更頹，而且象拔蚌和芽菜的比例是一比一(1:1)，已經好細碟，象拔蚌仲要咁少...不過油泡象拔蚌其實係一個好高難度的菜，因為炒過火係會好難食的。我覺得都算炒得剛好呀。

酸甜炸海魚

酸甜炸海魚真的麻麻，魚好腥，一係唔新鮮，一係果條唔係海魚係河魚。因為己經炸了我都吃不出係咩品種的魚，唔新鮮都扣幾多分。雖然炸粉不會太多，香口，但可能汁太少始終掩蓋唔到果陣臭腥味。所以呢碟被我評為呢個餐最唔好食的一道菜。

鮑片扒時菜

鮑片扒時菜又是份量好少的一碟，海鮮你同我講係貴我覺得好合理，但係菜都只係幾蚊斤，唔好恰我冇買開餸喎！味淡，冇乜鮑汁，而且鮑片較硬，可以再炆腍少少。

由於每碟小菜都太細份，所以我地點了長洲炒飯。

長洲炒飯

$78

單叫其實大碟過套餐好多，可能續樣叫仲抵食。炒飯好多餸，夠乾身，但冇獲氣，瑤柱仔冇味，俾咁大粒我都冇用。蝦米細到睇唔到，炒飯撈椰菜絲有啲怪。乜都加菜只會覺得為左keep住有咁大碟而偷工減料。好在撈芝士焗龍蝦的醬總算KO左個飯。(咁不如我叫白飯好過)仲好意思叫自己做長洲炒飯，映衰長洲呢個名呀。