呢個泰式羊架都幾特別，味道酸甜，但係就完全冇騷味，卻保留左羊肉嘅香味，味道均勻適中，酸甜味梗加令人醒胃想食多幾舊。
我哋兩個叫咗個馬拉盞通菜，炒得香口之餘，又唔會太鹹，以炒菜來講佢嘅味道都算係清新，好啱我哋鍾意食清淡少少嘅人。而且個份量都好大碟，足夠四個人食都得。
見到隔離枱有人食薄餅，都幾精緻，咁梗係要叫埋黃咖喱去襯番去啦，見到呢度有我哋最鍾意食嘅軟殼蟹，咁就唔使再諗食咩啦。薄餅鬆軟得來又唔會過分油膩，配合黃咖喱去食真係無得輸。
食完呢個濃味少少嘅餸，飲番啖佢嘅麒麟冰泡啤酒，真係爽丫丫架。個啤酒上邊啲泡沫係青檸沙味，食完濃味飲佢真係好疏肝。
最後梗係食返個硬野做結尾啦，佢個泰式炒金邊粉炒得都唔錯，酸味適中，令人會忍唔住口食多佢幾啖。
