日式放題喺香港越開越多，不過間間質素差唔多，不過大喜屋畀到我喜出望外嘅感覺。成間鋪頭基本上滿座，可以睇得出好受歡迎。我地首先叫嘅係一大盤刺身，全部都非常新鮮，魚類全部都切得非常厚，口感好好，而甜蝦有兩款可以選擇，有普通嘅甜蝦同特大版，兩種都非常鮮甜，唯獨係帶子冇乜特別。燒物之中最好食係羊鞍，非常入味之餘質地亦都異常地鬆軟，不過焗蠔就唔太突出，配料過多相比下蠔就太細粒。炸物嘅水準都唔錯，全部都炸到好鬆脆，吉烈蠔入面嘅蠔比起焗蠔大粒得多。總體而言，250蚊左右嘅價錢，食到咁多高質素嘅野食，非常之唔錯！
