古早味台灣原味 (Closed)

銅鑼灣啲嘢食到悶晒，嗰日忽然想食台灣野就睇吓附近有咩，搜尋到呢間就上咗去食。首先講吓店內環境先，位置都算闊落，啱啱地咁都幾多情侶同家庭嚟食。然後望一望Menu，價錢出乎意料地平，所以最後叫咗好多嘢食。我就叫咗個牛筋牛肚麵，麵唔會太淋，有少少咬口，個牛筋同個湯底都好正。但係身為食肉獸嘅我，絕對係唔會滿足。所以再加多咗個30幾蚊嘅鹽酥雞扒，炸得好脆同埋好大份，同朋友share勁抵食。我朋友唔係太肚餓就自己叫咗炒牛肉，原本睇個樣覺得一般般，點知食落去勁有鑊氣，推介之後佢食開咗個胃，叫咗碟手爪餅。原本我又係睇死會好難食，無肉嘅嘢點會好食㗎。點知唔知點解一食，係勁香口。啲咁平凡嘅嘢都可以整得好食，加分！我哋仲自己發明，用手爪餅點嗰個牛肉嘅汁，好好味呀媽咪。整體評語，食物性價比高，環境不錯適合傾計，都可以坐得幾耐下，想食台灣野不妨一試