一眼睇晒車仔麵喺面底、配菜、調味方面有咩選擇，仲有好多唔同小食可以揀。
仲另外有早餐同茶餐嘅餐單，都幾豐富。
除咗填餐紙外，仲可以用QR code手機自助落單，即時計到自己order嘅價錢，夠哂方便。每個座位面前都有一個小架俾客人放置手機同銀包，簡單嘅設計已經感受到貼心嘅服務👍🏼
堂食嘅餐具都用外賣餐具，咁就有啲唔太環保，但疫情期間呢個安排亦都無可厚非，始終衛生都好重要。
枱上面仲放咗六款唔同嘅辣醬，我覺得幾新穎，牆上面仲貼咗六款辣醬嘅介紹，每款都有唔同層次嘅辣，如果想試嘅話，可以問店員攞隻調味碟逐一品嚐。
我同同事都覺得超肚餓，所以每人揀咗五個餸，我嗰碗有午餐肉($8)、牛肚($10)、牛骨汁牛丸($10)、牛腩($12)同咖喱魷魚($12)配米線，仲加咗秘製辣汁。
同事同樣揀咗午餐肉同牛骨汁牛丸，仲有滷水雞腎($8)、蘭花豆卜($8)同豬骨湯貢丸($10)。我哋一致裁定牛骨汁牛丸係呢度嘅必食推介！滷水雞腎同咖喱魷魚亦都相當出色！
另外仲叫咗幾款小食，酥炸雞翼有三隻，係屬於大size嘅雞翼，炸得香脆又仍然保留肉汁，味道唔錯！
雞軟骨我起初預計只會有兩、三串，上枱先知原來係一大兜，份量都相當多，簡直好似五餅二魚咁夾極都仲有，我個人認為呢個超抵食！
炸燒賣總共有六粒，炸起之後脹卜卜，搽啲蜜糖甜甜哋，都可以一試。
脆B生煎包總共有三個，原來係一個扁扁嘅菜肉包，呢個味道就一般啦，我就比較推介以上三個小食喇！
