咁岩見到有午市訂座9折
就的起心肝去試啦！
我地有4個人，可以試多啲野
一入到去，見到牆上面有個好大個鐘既投映裝飾
絕對可以用黎做背景打卡影相
我地被安排坐係門口後面既一個小角落，好似一個半開放既小廂房咁，同時又可以望到出面既人
透過餐廳既西式木窗框望出去，配合窗外有香港特式既景色，相映成趣
係半開放「小廂房」抬頭一睇，盞燈係有剪影圖案，好少見，其實佢個地下都幾靚，但我唔記得影相
上網睇佢話西班牙海鮮飯、麻糬窩夫好好食，係招牌菜
所以就決定一定會叫呢兩樣！
另外就再叫左兩個set lunch ，見到又有湯又有甜品，好吸引
個湯係櫻花蝦粟米忌廉湯，入面有洋蔥
櫻花蝦味突出，同成個湯既好配合
豬軟骨幾腍，但又唔會散哂
啲軟骨全部食得到，唔會好似有時出面啲餐廳既軟骨太硬
芝士味香，唔係平時食開戈種芝士既種類（但我對芝士知識唔多，講唔出係邊種芝士）
一舊舊正方形戈啲食落似係日式卷蛋味既蛋
有兩樣野，第一啲飯林左啲，不過都算係勉強可以接受；另外一樣，就係啲青豆，因為佢個飯味本身唔係好濃味，反而佢啲青豆個味出過個飯，同行有一個朋友中意食青豆，就覺得冇問題，但另一個朋友就唔中意佢個青豆味太濃，搶左個飯味
牛舌唔un,意粉煮到岩岩好，唔會太硬/太腍
意粉都好入味，唔係煮完個意粉就求其淋個汁上去
重點黎啦，西班牙海鮮飯，海鮮好夠多好豐富，蜆食到鮮味，蝦好香蝦殻戈啲味（用蝦殻熬湯戈隻味）。蝦食落唔梅，好好味。食個飯賣相排得好吸引，食落亦都好惹味。但係個飯係有啲辣既～唔知下次可唔可以叫佢小辣。食得辣既朋友應該覺得已經係小辣😂😂😂😂
重點二黎啦，全份窩夫$138，半份$108，當然叫半份！
雜果用上無花果、黑莓呢啲成本較貴既鮮果，贊
鮮果同窩夫中間夾左吉士，更加香
麻糬夾左係窩夫中間，煙煙unun，特別既窩夫～
再淋上超香既蜜糖，為窩夫增加一啲濕潤
如果蜜糖可以多少少就更加完美～
咖啡既奶係暖笠笠既奶，唔會整凍左杯咖啡
跟set lunch 既甜品係曲奇泡芙，入面有cream
相比起之前咁多樣菜式
呢個泡芙就有啲比下去，普普通通一個泡芙
最後，填完問卷送左一個焦糖燉蛋
反正呢個好好食，雖然係送既
但都用左雲呢拿籽
一定會再黎，試埋其他野
