MX (新港城廣場) (Closed)

我本身都好鍾意食焗豬扒飯，以幾間有名連鎖快餐店而言，以前「大家X」的豬扒飯是我認為比較好食的，但最近聽朋友講美心MX的焗豬扒飯好食咗好多，所以想去試試其豬扒飯的水準，經過馬鞍山新港城廣場美心MX，原來呢間美心MX已經改為叫「MX」，雖然無咗美心，但應該仲係美心集團的。先去收銀處向店員落單叫一客焗豬扒飯，$40，加一杯七喜，加$6，共俾$46後攞飛，去揾位等叫號碼，呢間MX有自助凍/熱水機，唔駛下下去店員攞水，幾方便。等咗幾分鐘就有得攞，將餐盤攞去我已放低袋嘅枱，未開始食前，先將焗豬扒飯上的一塊豬扒、番茄、菠蘿、茄汁及炒飯放到另一隻碟上，並將豬扒切件，才開始進食，豬扒都叫有咬口、番茄外皮焗到乾身而裏面仍留住水份、芝士焗到夠香口、茄汁沒有過酸、不過靑豆少少乾、炒飯底算夠乾身，真的比起「大家X」同「大快X」好食咗。