好多餐晏晝都喺厚福街搵食。心血來潮想轉下口味，就行入後巷，發現呢間門面都裝修得幾企理嘅日式拉麵店。
我點午市套餐，加八蚊嘅蝦湯拉麵加烤雞軟骨。一入門口，聽店員講嘢有普通話口音，老實講會有些少戒心。但唔入都入咗，畀次機會咯。地方算寛敞，當時無乜客，我一人坐四人卡位。
由於有疑慮在先，所以都留意下廚房陣勢。師傅畀我感覺有啲懶懶閒，單手拎起碗麵唔知同店員講乜。最後見師傅親自拎碗麵出來畀客人。拎畀我嗰時，佢單手沿邊邊慢慢跣落枱面，一聲不發。成套動作怪怪地。
一食就嬲，估唔到今時今日喺香港重會食到呢種明顯扮日式呃錢嘅垃圾。湯係簡單粗暴嘅味精湯，係面頭加咗羹蝦米同疑似蝦油先無咁肉酸。麵就似超級市場買返來嘅貨色淥一淥。好慷慨咁跟咗一塊叉燒，切得唔厚唔薄，唔覺有特別調味，勝在有咬口啲咯。居中放咗幾隻熟蝦，就係白烚嘅熟蝦，真係開咗我食日式拉麵嘅眼界。勉為其難咁食完。通常食拉麵我會飲晒碗湯，有飽腹感。今次撈少少蝦米就算，食完個嘴同個胃都不得滿足。
之後上嘅烤雞軟骨就不過不失。串燒或其他小食似乎係由一位都係有普通話口音嘅大嬸負責，同樣係邊個煮就邊個上菜，所以係大嬸遞畀我。埋單重要加一，承惠 $85。通常食完好嘅日本菜，我都鍾意靜靜地坐一陣嘆下茶。今次食完只係成肚中咗伏嘅怨氣，快快脆走，邊埋單邊打緊呢篇食評。
我會形容呢碗麵係侮辱緊香港人嘅味蕾。都咩年代喇，唔通重覺得香港人好蠢啲錢好好呃？咁今舖我無查清楚虛實就貪得意試咗，的確蠢咗一次嘅。喺附近咁多食肆嘅尖東，呢間山寨拉麵完全無存在價值，快啲執唔該。見呢度讚好嘅帖咁多，真心疑惑當中有幾多係做枚喇。
講開都幾奇怪，既然有咁多工夫賣山寨麵呃錢，點解唔好好地煮返家鄉菜呢？或者索性鍛煉返門手藝先開舖呢？
