西班牙火腿配自家制油醋芝士沙律
火腿嘅濃郁風味與油醋醬的酸甜平衡得宜，加埋雜果仁，沙律菜好新鮮，食落開胃得黎又有層次感。
蒜香炒小魷魚
魷魚炒得恰到好處，軟滑有彈性，蒜香味濃而且帶點辣勁，好惹味。
主菜可以揀牛、雞或者豬，我地嗌左烤豬骨排。
烤得外皮微微焦香，入面嘅肉都幾嫩滑，保留到肉汁。醬汁味道香濃，甜味中帶少少酸。配埋薯菜食啱啱好，可以中和豬仔骨嘅膩。
蝦汁大蝦扁意粉
意粉好掛汁，醬汁係話用蝦頭炒香之後熬製而成，好香好濃郁。大蝦結實彈牙，絕非急凍貨，扁意粉硬度都煮得剛剛好。
蘋果玉桂藍莓酥皮餅配2雪糕
雪糕有五款可以揀，我哋揀咗朱古力同曲奇味，雪糕正常表現，不過不失。酥皮烤得金黃香脆，加埋焗過嘅蘋果雜莓，好夾，酸甜適中。玉桂味都好香，配埋雪糕食一流。
椰汁燉桃膠
糖水都幾大碗，有好多桃膠同雪耳，椰汁底唔會太甜，食落好潤。
特別值得一讚嘅係服務態度超級好，侍應好有禮貌，又會密密卙水。上菜嘅速度係啱啱好，一碟接一碟，唔會要食好急，都唔會要等好耐，而且每碟菜都係熱辣辣啱啱煮好。好欣賞佢哋呢方面嘅心思，好細心！
