果然係熱門餐廳，下午一點幾兩點去到，仲有好多人嚟呢間餐廳食飯。
餐廳唔算大，但係有濃厚台灣色彩，幾乎所有枱都坐滿晒人，可能今日比較遲去，過咗繁忙時間我就唔使等位就即刻入得啦。
我叫咗個牛肉麵同埋鮮梅酥豬扒滷肉飯再加兩杯嘢飲，唔知係咪客人比較多，上野食既速度唔算快，如果趕時間的話，呢度可能就爭啲啦。
首先上場嘅係鮮梅豬扒滷肉飯，豬扒有啲估佢唔到，我幻想中嘅豬扒係香脆嘅，炸得唔好可能仲會乾，但係呢度炸出黎就唔屬於脆口，但係佢者係香，而且入面係鮮嫩多汁嘅，配埋佢個梅汁，酸酸地好，好開胃，令到炸豬扒少咗油膩嘅感覺
。滷肉味道唔錯，如果飯再乾身啲就更好。
以後就到佢嘅豐盛台灣牛肉麵，個湯汁濃郁，微辣。話明豐盛台灣牛肉麵，佢啲料係豐盛嘅，有好幾款啲肉丸，而且牛肉都包含咗幾個部位（雖然我唔知係咩部位，但食得出，睇得見係唔同部位嚟嘅）。不得不說，佢嘅牛肉整體煮得好冧，好入味。
最後仲有個逢甲鹹酥雞，外脆內嫩嘅，作為一個小食，味道份量都唔錯。
之後，可能餐廳客人比較多，比較忙，等咗一段時間，嘢食食得七七八八嘅時候，嘢飲終於上嚟啦，有鮮榨檸檬椰果多多（半糖）同埋仙草奶凍（半糖）。
鮮榨檸檬椰果多多，正，飲落去非常醒神，可能半糖嘅關係，加埋有檸檬，多多又係微酸，整體就變得比較酸，但飲落係好飲、刺激嘅。
仙草奶凍，味道都非常好，淨係飲佢啲奶，感覺似係3.6牛乳，再飲埋佢啲仙草， 仙草好滑，而且仙草味好濃，兩者一齊混埋黎飲，半糖甜度啱啱好。
總結：整體表現不俗，味道環境中上，難怪咁多人喜歡，但係如果你趕時間，可能就未必適合啦，搵日得閒出嚟試啦。
