二鍋頭 (福苑)

Open Now

Now Closed

之前食過一啲雞煲放題，不過雞唔係任食，配料先有得任食，但係今日呢間比較特別，佢有雞煲、鴨煲、豬手煲，全部都可以任食，適合一大班人一齊，可以試多幾款煲。不過我哋得兩條友，食完一份雞煲已經食唔落鴨煲，直接開始打邊爐🤣佢嘅雞煲都算入味，炒得好香，雞肉唔會太實，以任食嚟講算好高質。之後打邊爐嘅湯底唔係求其用返雞煲加雞湯㗎，佢有好多選擇，連泰國冬陰公都有👍🏻不過人多先可以揀2個湯底以上。而配料都幾多選擇，海鮮都唔少，我覺得白鱔同帆立貝都唔錯。而肉類都有齊豬牛羊雞鴨，選擇都唔少。另外仲有個雪櫃放咗好多配料自取，幾款丸同波波腸都幾好味，仲有炸芋頭同淮山☺️最後仲有好幾款雪糕，正呀。另外環境都乾淨舒服，比一般任食嘅店空間感要足。