四寶食堂 (Moved) New Location

今晚係炮台山附近經過見呢間餐廳嘅滑蛋蓋飯幾吸引，就同朋友入去試一試，唔洗等位就有得入。我就叫左個蜜汁叉燒滑蛋蓋飯，而我朋友就叫左個瑞士汁干炒牛河，另外加多個馬拉盞炒菜心同埋奶油脆豬，野飲方面就叫左兩杯凍檸茶，總共就$237。首先要讚嘅係佢個叉燒滑蛋蓋飯，蛋嘅分量好多，而且炒得真係好滑，仲有少少蛋漿，而且叉燒亦都唔會太肥。而個干炒牛河個汁亦都幾濃，河粉嘅硬度亦適中，而且份量好多，食完真係會好飽。個炒菜心亦唔錯，炒得好入味，而且唔會太軟。最好個奶油豬係新鮮出爐，十分之脆，奶油亦都好夠。