Pizza Max

平時星期日經過呢間小店，下晝又好，夜晚又好，都唔覺有人幫襯。

今次星期二夜晚，七點去到諗住都冇乜人。點知坐滿晒，剩返張出菜位隔離嘅面壁枱，女朋友話冇問題，咁就照坐。不過舖面細細，一間舖面百幾二百呎嘅空間，坐咗接近廿個人，其實都幾迫吓。

呢廿幾個人，由一個識廣東話嘅尼泊爾女仔侍應，落單執枱水吧斟水上菜一腳踢，仍然綽綽有餘。

好，點咗四個菜，包括有餃子、同事同女友都推介嘅雞翼、沙律同埋8吋薄底薄餅。呢度嘅薄餅有三種呎吋，同埋厚底薄低任君選擇，咁我哋兩個人唔大食，自然叫個最細最薄啦。

點完菜，侍應小姐見我哋冇叫嘢飲，轉個頭都入去水吧斟兩杯水比我哋，服務都算唔差。

等咗幾十幾分鐘，第一道菜上枱。

清淡，可以話冇味道嘅

雞肉餃子有分蒸同煎兩種。我哋兩個咁啱病病哋，叫咗個蒸嘅。蒸嘅配咗個蕃茄醬。可惜，乜醬都唔點，剩食蕃茄醬配餃子，結果係雞肉冇味，茄醬都冇乜味。結果係！

配薄荷蛋黃醬，但係唔點醬都一樣咁惹味

呢碟雞翼棒連同事都推介，斷估冇失手。事實係，唔點中間嘅醬，入口已經咁香滿腔，又唔會燒到好似柴皮咁冇晒juicy，食完一隻又一隻……見到隔離大枱叫咗全隻燒雞，其實都幾吸引，人多時候真係想嚟試返隻！

牛油果味較突出

再嚟就係牛油果沙律。可能係隻醬嘅味唔突出，所以呢碟沙律我最記得嘅就只有牛油果味。

夠薄夠脆

另一個期待上枱。其實我唔記得叫咗個咩Pizza，只係記得有菇有肉腸，食落夠脆夠薄身，都總算有啲芝士味，但係又未到一試難忘嘅程度。有機會可以試第二隻，或者會有驚喜。

總結係，呢檔嘢其實有好多進步空間，不過未試過嘅可以試吓。而呢檔嘢最耍家嘅，應該係燒烤食品，所以下次再嚟食嘅話，燒雞等食品一定行先。