Imasa

一直都覺得一生人點都要去一次半島, 咁o岩知道Imasa o既buffet只需要$495, 所以起2月頭就已經打黎訂位喇

buffet 由6點正開始, 因為事前得知場地唔大, 所以早左一個字到, 帶位姐姐好好咁安排左近食物o既位置俾我地 先係問我地要唔要飲品, 然後再介紹一下當日menu入面有o既main course同各款手卷

見仲未有太多人, 於是出去睇下有咩好食啦, 放食物o既地方一眼睇晒, 款式真係唔多, 不過每款食物賣相都好好呀. 刺身同好多酒店一樣, 都係放晒出黎俾客人自己拎o既, 剛開始時唔見有cake喎, 一路諗唔係冇cake呀嘛?

之後有waiter話可以開始拎食物喇, 咁首先主力梗係刺身啦, 有帶子, 甜蝦, 油甘魚, 三文魚, 吞拿魚, 海膽, 北寄貝同魷魚. 帶子都幾鮮甜, 甜蝦亦係水準以上, 海膽就梗係唔使講啦, 夠晒新鮮. 反而三文魚就無咩驚喜 壽司方面只係試左火炙三文魚, 軍艦壽司都有三,四種, 因為唔想浪費quota就冇試到, 食野期間會有waiter不斷加茶, 有客人跌左餐巾落地下佢地都會好好咁幫人執番然後接番好

食左幾輪刺身已經飽左5成, 搞到熟食都唔係試左好多, 先係食左銀鱈魚西京燒, 燒得好香呀, 魚肉亦到好滑, 食完之後仲隱約聞到陣香味 之後都分別試左牛肉信田卷同茶碗蒸, 茶碗蒸實在好足料!! 我個碗仲有幾條蟹柳添, 拎到返埋位仍然好夠熱

食到咁上下主菜就黎喇, 時日分別係羊扒同蝦天婦羅, 因為我唔食羊, 所以唯有叫天婦羅啦, 味道黎講係比較失望, 我認為同起出面普通日本餐廳o既冇太大分別, 至不過係佢賣相比較好. waiter建議我地可以叫埋稻庭烏冬一齊食,話會有另一番風味 烏冬應該係即整, 一d都唔稔, 仲有d彈牙添, 不過個湯底就一般般啦

中場行過見到終於有cake喇!!! 總共都試左有5款咁多, 印象比較深o既係mango mousse cake, strawberry cheese cake, green tea mousse, new york cheese cake. 我覺得款款都係誠意之作, 最好味係green tea mousse 同 new york cheese cake!

最尾order埋2球雪糕, 有sweet potatoes同柚子, 2種味道同都好, 不過因為唔鍾意太甜, 所以prefer 柚子味, 而且佢仲有柚子粒起雪糕入面, 食完之後覺得中和返今日食過o既油膩野, 感覺好好

埋單時waitress好好咁幫我地換杯熱茶, 2個人食到捧住個肚返屋企, 希望下次再試埋半島o既tea啦